សមាជិក​ក្រុម​U22ឥណ្ឌូនេស៊ី កីឡាករ Witan Sulaeman បាន​បង្ហាញខ្លួន ក្នុងស៊ីហ្គេម ៣លើកជាប់ៗគ្នា

CAMSOC-ឥណ្ឌូនេស៊ី៖ ក្រុមជម្រើសជាតិឥណ្ឌូនេស៊ីអាយុក្រោម ២២ឆ្នាំ (U22) ដែល​នឹង​ចូលរួម​ការ​ប្រកួត​ព្រឹត្តិការណ៍​កីឡាស៊ីហ្គេម លើកទី៣២ ឆ្នាំ២០២៣ នៅប្រទេស​​កម្ពុជា ខាង​មុខ​នេះ ត្រូវ​បាន​សហព័ន្ធ​កីឡា​បាល់ទាត់​ឥណ្ឌូនេស៊ី (PSSI) ប្រកាសឈ្មោះ​​ជាផ្លូវការហើយ កាលពីថ្ងៃទី២១ ខែមេសា។

ចំពោះ​កីឡាករទាំង២០នាក់ ដែល​ត្រូវ​បានប្រកាស​នោះ គឺ​ភាគច្រើនប្រកបអាជីពនៅលីគបាល់ទាត់ក្នុងស្រុក ក្នុងនោះក៏មានកីឡាករ ២នាក់ប្រកបអាជីពនៅក្រៅប្រទេសផងដែរ ដោយ​មានបញ្ជីឈ្មោះដូចខាងក្រោម៖

លោក Erick Thohir ប្រធានសហព័ន្ធកីឡាបាល់ទាត់ឥណ្ឌូនេស៊ី បាននិយាយថា ៖​«ពិតណាស់ នេះមិនមែន​មាន​ន័យថា អ្នកដែល​មិន​ត្រូវ​បាន​គេ​ជ្រើសរើស​ មិនមែន​ជា​ផ្នែក​ដ៏​ល្អ​បំផុត ​សម្រាប់​អនាគត​របស់​ប្រទេស​ឥណ្ឌូនេស៊ីនោះទេ ប៉ុន្តែនេះ​ជាជម្រើស ដែលត្រូវតែធ្វើឡើង។ យើងរៀបចំក្រុម ដែលត្រៀមរួចជាស្រេច ជា​ពិសេស​ផ្លូវចិត្ត ហើយ​នេះជាកន្លែង ដែលយើងបានជ្រើសរើសថ្ងៃនេះ ពីព្រោះអ្នកទាំងនេះ​ នឹង​ត្រូវ​បាន​ចុះ​ឈ្មោះ​ដោយ​​គ្រូបង្វឹក ​ទៅគណៈកម្មាធិការអូឡាំពិក»។

នៅ​ក្នុងចំណោមបញ្ជីឈ្មោះកីឡាករ២០រូបនេះ ក៏ប្រមូលផ្ដុំទៅដោយកីឡាករ ដែលធ្លាប់ប្រកួតស៊ីហ្គេមម្ដង និង ២ដង​រួច​មក​ហើយផងដែរ មានដូចជា អ្នកចាំទី Adi Satryo, Ernando Ari ខ្សែការពារ Alfeandra Dewangga, Rizky Ridho, Rio Fahmi ខ្សែបម្រើ Marselino Ferdinan និងខ្សែប្រយុទ្ធ Ifran Jauhari ដោយ​អ្នកទាំង ៧ ធ្លាប់បង្ហាញខ្លួននៅស៊ីហ្គេម លើកចុងក្រោយ ដែលធ្វើឡើងនៅប្រទេសវៀតណាម កាលពី​ខែឧសភា ឆ្នាំ​២០២២។

ដោយឡែកខ្សែបម្រើ Witan Sulaeman វិញ ត្រូវបានដឹងថា ចូលរួមក្នុងព្រឹត្តិការណ៍កីឡាស៊ីហ្គេមនេះ ជាលើកទី៣ ជាប់ៗគ្នាហើយ បន្ទាប់ពីរូបគេ បានបង្ហាញខ្លួនជាលើកដំបូង កាលពីស៊ីហ្គេម លើកទី៣០ ឆ្នាំ២០១៩ នៅប្រទេសហ្វីលីពីន និងស៊ីហ្គេម លើកទី៣១ ឆ្នាំ២០២១ (លើកមកឆ្នាំ២០២២) នៅ​ប្រទេស​វៀតណាម។

សម្រាប់ការ​បង្ហាញ​ខ្លួន នៅស៊ីហ្គេម លើកដំបូងរបស់ខ្លួន Witan Sulaeman រកបាន ១គ្រាប់ និង​ជួយ​ឱ្យក្រុម​ឥណ្ឌូនេស៊ី ទទួលបានមេដាយប្រាក់ នៅឆ្នាំ២០១៩ ចំណែក​ស៊ីហ្គេម ឆ្នាំ២០២២ កន្លងទៅ គេរកបាន​៣គ្រាប់ នាំឱ្យ​ក្រុមឥណ្ឌូនេស៊ី ​ទទួល​បាន​មេដាយសំរឹទ្ធ។

មុន​ការប្រកាសបញ្ជីឈ្មោះ​២០នាក់ចុងក្រោយ ជាផ្លូវការ​នេះ ក្រុម​U22​ឥណ្ឌូនេស៊ី បាន​ឆ្លង​កាត់​ការ​បោះជំរំ​ហ្វឹកហាត់​ជាច្រើនដំណាក់កាល ដោយ​ផ្តើមចេញ​ពីការ​ជំរំហ្វឹកហាត់ ដំណាក់កាលទី១ ពីថ្ងៃទី១ ដល់​ទី​៨ ខែមីនា រួច​បន្ត​បោះជំរំហ្វឹកហាត់ ដំណាក់កាលទី២ ពីថ្ងៃទី៨ រហូតដល់ថ្ងៃទី១៦ ខែមីនា។ បន្ទាប់មកគ្រូបង្វឹក លោក Indra Sjafri បានកោះហៅកីឡាករចំនួន​៣៦​នាក់ សម្រាប់​ការ​ប្រមូល​ផ្តុំ​ចុងក្រោយ ដែល​មាន​រយៈពេលរហូត ដល់ពេលនេះ។

លោក Indra បានធ្វើតេស្តកីឡាករ រួមទាំងការប្រកួតសាកល្បងចំនួន៣លើក បូកនឹងប្រកួតបិទទ្វារផងដែរ ហើយ​ការធ្វើតេស្ដ​ដំបូង គឺ​​ក្រុម​U22​ឥណ្ឌូនេស៊ី បានប៉ះ​ជាមួយ​ក្លិប Bhayangkara FC ដោយ​បាន​លទ្ធផលស្មើ ១-១។ បន្ទាប់មក U22ឥណ្ឌូនេស៊ី ប្រកួតជាមួយ​ក្រុម​U22លីបង់ ចំនួន​២ដង ដោយចាញ់ ១-២ និងឈ្នះ ១-០។

ក្រុមU22Cជម្រើសជាតិ​ឥណ្ឌូនេស៊ី ស្ថិត​ក្នុង​ពូល​A នៃ​ស៊ីហ្គេម ឆ្នាំ​២០២៣ រួម​ជាមួយ​ក្រុម​ម្ចាស់​ផ្ទះ​កម្ពុជា ហ្វីលីពីន មីយ៉ាន់ម៉ា និងទីម័រខាងកើត ហើយ​ក្នុង​នោះ ហ្វីលីពីន នឹងក្លាយ​ជា​គូប្រកួតដំបូង សម្រាប់​ក្រុម​U22 ឥណ្ឌូនេស៊ី នៅថ្ងៃ ទី២៩ ខែមេសា នៅពហុកីឡដ្ឋានជាតិ។ បន្ទាប់មក ក្រុម U22 ឥណ្ឌូនេស៊ី ត្រូវ​ជួប​ក្រុម​ U22មីយ៉ាន់ម៉ា នៅថ្ងៃទី៤ ខែឧសភា មុនពេលប៉ះ​ក្រុម​U22ទីម័រខាងកើត នា​ថ្ងៃទី៧ ខែឧសភា និង​ចុង​ក្រោយ ពួកគេ ត្រូវ​ជួបក្រុម​កម្ពុជា នៅ​ថ្ងៃទី១០ ខែឧសភា៕