សម្ដេចតេជោ ហ៊ុន សែន អំពាវនាវឲ្យកម្មករ-កម្មការិនី និងប្រជាពលរដ្ឋ ចូលរួមគាំទ្រកីឡាអាស៊ានប៉ារ៉ាហ្គេម លើកទី១២ នាខែមិថុនា

CAMAPGOC-ភ្នំពេញ៖ សម្ដេច​អគ្គមហា​សេនាបតី​តេជោ ហ៊ុន សែន នាយករដ្ឋមន្ដ្រីនៃព្រះ​រាជា​ណា​ចក្រ​កម្ពុជា បានអំពាវនាវដល់កម្មករ-កម្មការិនី និងប្រជាពលរដ្ឋទាំងអស់ ចូលរួមគាំទ្រ និងលើកទឹកចិត្តដល់ការប្រកួតកីឡាជនពិការអាស៊ីអាគ្នេយ៍ ឬកីឡាអាស៊ានប៉ារ៉ាហ្គេម លើកទី១២ ដែលកម្ពុជាធ្វើម្ចាស់ផ្ទះ ចាប់​ពី​ថ្ងៃទី៣ ដល់ថ្ងៃទី៩ ខែមិថុនា ឆ្នាំ២០២៣ នៅរាជធានីភ្នំពេញ។

ការអំពាវនាវរបស់សម្ដេចតេជោនាយករដ្ឋមន្ដ្រី ធ្វើឡើងក្នុងឱកាសសម្តេចបានអញ្ជើញជួបសំណេះ​សំណាលជា​មួយកម្មករ-កម្មការិនី និងនិយោជិត​សរុបចំនួន ១៩,០០០នាក់​ នៅតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ នៅព្រឹកថ្ងៃទី២៦ ខែឧសភា ឆ្នាំ២០២៣ នេះ។

សម្ដេចតេជោ ហ៊ុន សែន មានប្រសាសន៍ថា ៖«ឥឡូវ​នេះ នៅសល់តែ ៨ថ្ងៃទៀតទេ ក្មួយៗ កីឡាអាស៊ានប៉ារ៉ាហ្គេម គឺការប្រកួតកីឡាជនពិការនឹងមកដល់។ ក្មួយៗទាំងឡាយត្រូវផ្តល់ការគាំទ្រ លើកទឹកចិត្តឲ្យកីឡាជនពិការរបស់យើង មិនខុសពីកីឡាដែលមានកាយសម្បទាល្អនោះទេ។ ចំណុចនេះ គឺត្រូវរៀបចំលិខិតឲ្យមកក្រសួងការងារខ្លះ សម្រាប់ចែកឲ្យកម្មករ ព្រោះយើងបើក និងបិទអត់មានអ្វីខុសពីព្រឹត្តិការណ៍ស៊ីហ្គេមនោះទេ ក្នុងនាមយើងជាម្ចាស់ផ្ទះ»។

សម្ដេចតេជោនាយករដ្ឋមន្ដ្រីបន្ថែមថា នៅល្ងាចថ្ងៃទី២៦ ខែឧសភានេះ សម្ដេចនឹងជួបសំណេះសំណាល និងជូនដំណើរកីឡាករ-កីឡាការិនីជនពិការកម្ពុជា ទៅប្រកួត ប៉ុន្ដែជូនដំណើរពីវិមានសន្ដិភាព ទៅទីកន្លែងប្រកួត ដូចស៊ីហ្គេម លើកទី៣២ ដែរ ខុសពីលើកមុនៗ ដែលសម្ដេចជូនដំណើរពីវិមានសន្ដិភាព ទៅប្រកួតនៅប្រទេសនេះ ឬប្រទេសនោះជាដើម។

សម្ដេចមានប្រសាសន៍ថា ៖«ល្ងាចនេះ ពូនឹងជួបកីឡាករ-កីឡាការិនីជនពិការ ទៅទីតាំងប្រកួត ដែលនឹងត្រូវបើក នៅល្ងាចថ្ងៃទី០៣ ខែមិថុនា។ ក្មួយៗចាំមើល គេចង់បន្ថែមម៉ោងបាញ់កាំជ្រូចបន្ថែមទៀត ព្រោះដើម្បីលើកទឹកចិត្ត និងស្វាគមន៍ ចំពោះកីឡាករ-កីឡាការិនីដែលមានពិការភាព មកពី ១១ប្រទេស បូកទាំងកម្ពុជាយើង»។

សម្ដេចតេជោ ហ៊ុន សែន បានសង្កត់ធ្ងន់ថា ៖«អ៊ីចឹងប្រទេសកម្ពុជា ក៏ដូចជាថ្ងៃបុណ្យមួយដែរ ក្នុងរយៈពេលកន្លងទៅ ពេលស៊ីហ្គេម ដែលយើងសប្បាយរីករាយទាំងអស់គ្នា។ ហើយប្រធានបទ “កីឡារស់ក្នុងសន្ដិភាព” គឺជាប្រធានបទ ដែលត្រូវបំផុត ព្រោះកាលណាមានសង្គ្រាម ក្មួយៗអើយ មានការប្រយុទ្ធគ្នាហើយ កុំថាឡើយកីឡា សូម្បីតែក្មួយៗក៏រត់ជាន់ជើងគ្នា។ បើគេបិទរោងចក្រ ក្មួយៗរត់ទៅស្រុកអស់ហើយ។ ចឹងបានថា នាំគ្នាការពារសន្ដិភាព ការពារស្ថេរភាពនយោបាយឲ្យបាន»។

គួរដឹងថា កីឡាអាស៊ានប៉ារ៉ាហ្គេម លើកទី១២ នៅកម្ពុជា នឹងចាប់ផ្ដើមពីថ្ងៃទី៣ ដល់ថ្ងៃទី៩ ខែមិថុនា ឆ្នាំ២០២៣ ដោយមានកីឡា ១៣ប្រភេទ ត្រូវបានដាក់ឲ្យធ្វើការប្រកួត រួមមានកីឡាកីឡាអត្តពលកម្ម, ហែលទឹក, វាយសី, ប៊ូស្យា, អុក, បាល់ទាត់បុរស(៥ម្ខាង និង ៧ម្ខាង) បាល់បោះពិការភ្នែក, យូដូ, លើកទម្ងន់, វាយកូនឃ្លីលើតុ, បាល់ទះអង្គុយ, បាល់បោះជិះរទេះ និងកីឡាអេឡិចត្រូនិក(E-Sports)។ សម្រាប់កម្ពុជា ក្នុងនាមម្ចាស់ផ្ទះ​ បានត្រៀមកីឡាករ-កីឡាការិនីសរុបចំនួន ២៣៦នាក់ ដើម្បីចូលរួមប្រកួតប្រជែងមេដាយជូនជាតិមាតុភូមិ៕