ប្រភេទកីឡាសីដក់ និងឈិនឡូន មានការប្រកួតប្រជែងលើ២១វិញ្ញាសា សម្រាប់ស៊ីហ្គេម ២០២៣
CAMSOC-ភ្នំពេញ៖ សហព័ន្ធកីឡាសីដក់ និងឈិនឡូនកម្ពុជា និង សមាគម សីប៉ាក់តាក្រអាស៊ី បានរៀបចំពិធីចាប់ឆ្នោតចែកពូល កាលពីល្ងាចថ្ងៃទី២៤ ខែមេសា ឆ្នាំ២០២៣ នៅទីស្នាក់ការគណៈកម្មាធិការជាតិអូឡាំពិកកម្ពុជា (NOCC) សម្រាប់ការប្រកួតកីឡាស៊ីហ្គេម លើកទី៣២ ឆ្នាំ២០២៣ ដោយប្រភេទកីឡានេះ មានប្រទេសចូលរួមចំនួន១០ ដើម្បីធ្វើការប្រកួតប្រជែងដណ្តើមយកមេដាយ នៅលើវិញ្ញាសាសរុបចំនួន២១។
ពិធីចាប់ឆ្នោតចែកពូលនេះ បានធ្វើឡើងក្រោមវត្តមានឯកឧត្តមបណ្ឌិត មាស សារិន ប្រធានសហព័ន្ធកីឡាសីដក់ និងឈិនឡូនកម្ពុជា និងលោក Abdul Halim Bin Karder ប្រធានសមាគមសីដក់អាស៊ី (Asian Sepaktakraw Assiciation) ព្រមទាំងមានការចូលរួមជាសាក្សីពីតំណាងប្រទេសនានាក្នុងអាស៊ីអាគ្នេយ៍ដោយផ្ទាល់ និងតាមប្រព័ន្ធអនឡាញ ដើម្បីជាសក្ខីភាពនូវការបែងចែកពូលនេះ ប្រកបដោយភាពត្រឹមត្រូវ និងយុត្តិធម៌។
លោក Abdul Halim Bin Karder ប្រធានសមាគមសីដក់អាស៊ីបានបង្ហាញក្តីរីករាយ និងថ្លែងអំណរគុណសម្តេចតេជោ ហ៊ុន សែន នាយករដ្ឋមន្ត្រីកម្ពុជា, សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិ CAMSOC-CAMAPGOC ព្រមទាំងប្រតិបត្តិករកីឡា CAMSOC-CAMAPGOC ដែលបានអនុញ្ញាតឱ្យសហព័ន្ធបានរៀបចំការចាប់ឆ្នោតចែកពូល សម្រាប់ប្រភេទកីឡាសីដក់ និងឈិនឡូន សម្រាប់ការប្រកួតកីឡាស៊ីហ្គេម-អាស៊ានប៉ារ៉ាហ្គេម ២០២៣។ ការចាប់ឆ្នោតបែងចែកពូលនេះ ត្រូវបានធ្វើឡើងក្រោមនិតិវិធីរបស់គណៈកម្មាធិការជាតិ CAMSOC និងសហព័ន្ធកីឡាសីដក់ និងឈិនឡូនអាស៊ី ដែលធ្លាប់បានធ្វើការប្រកួតកីឡាស៊ីហ្គេម កន្លងមក។
លោក ទុយ ប៊ុនហឿន អនុប្រធានសហព័ន្ធកីឡាសីដក់ និងឈិនឡូនកម្ពុជា បានបញ្ជាក់ថា សម្រាប់ប្រភេទកីឡាសីដក់ គឺមាន១០ប្រទេសក្នុងអាស៊ីអាគ្នេយ៍ បានចូលរួមប្រកួតប្រជែងមេដាយចំនួន១០វិញ្ញាសា ចំណែកប្រភេទកីឡាឈិនឡូន មាន៥ប្រទេសប្រជែងមេដាយលើ១១វិញ្ញាសា ព្រោះប្រទេសខ្លះ មិនបានចូលរួមលើវិញ្ញាសាឈិនឡូននេះទេ។
«តាមការកំណត់ក្នុងស៊ីហ្គេម គឺចាប់ពី៤ប្រទេសឡើងទៅចូលរួមប្រកួតក្នុង១វិញ្ញាសា ទើបវិញ្ញាសា១នេះ អាចរៀបចំការប្រកួតបាន ប៉ុន្តែមានវិញ្ញាសាខ្លះមានត្រឹមតែ៣ប្រទេសប៉ុណ្ណោះ ដោយនេះជាគោលការណ៍របស់សហព័ន្ធសីដក់អាស៊ី ព្រមទាំងមានការឯកភាពពីបណ្តាប្រទេសដែលចូលរួម»។ លោក ទុយ ប៊ុនហឿន បានបញ្ជាក់បន្ថែម ខណៈប្រភេទកីឡាសីដក់ និងឈិនឡូន ដែលមានសរុប២១វិញ្ញាសានេះ នឹងដំណើរការប្រកួតពីថ្ងៃទី០៦ ដល់ថ្ងៃទី១៦ ខែឧសភា ឆ្នាំ២០២៣ នៅសាលមជ្ឈមណ្ឌលជាតិហ្វឹកហ្វឺនកីឡានៃពហុកីឡដ្ឋានជាតិអូឡាំពិក៕
ការរត់ភ្លើងគប់ស៊ីហ្គេម-អាស៊ានប៉ារ៉ាហ្គេម ២០២៣ បន្តទទួលបានភាពជោគជ័យ នៅប្រទេសឥណ្ឌនេស៊ី
ក្រុមហ៊ុនឆ្នោតកីឡាជាតិ ឧបត្ថម្ភកុំព្យូទ័រ ៤៥គ្រឿង មានតម្លៃប្រមាណ ២ម៉ឺនដុល្លារ ដល់ NOCC និងសហព័ន្ធកីឡាជាតិ
អ្នកជំនាញការ៉ាតេអន្តរជាតិ មកចែករំលែកដល់កម្ពុជា ត្រៀមឆ្ពោះទៅជោគជ័យស៊ីហ្គេម ២០២៣
អគ្គលេខាធិការក្លិបអាយអេសអាយដង្កោរសែនជ័យ ប្រាប់ពីមូលហេតុក្លិបខ្ចីកីឡដ្ឋានក្រុមផ្សេងប្រើប្រាស់បណ្ដោះអាសន្ន